भोकरदनचे राजकारण उकळत्या टप्प्यावर! चार प्रमुख पक्ष रणांगणात, अपक्षांचा तिखट तडका ; दिग्गजांची प्रतिष्ठा धोक्यात?

यंदा नगराध्यक्ष पद इतर मागास प्रवर्ग महिला गटासाठी राखीव झाले आणि असे होताच राजकीय पटल पूर्णपणे उलथापालथ झाले. घरचेच उमेदवार पुढे येऊ शकले नाहीत, अनेक दिग्गजांची वर्षानुवर्षांची जोपासलेली गणिते एक झटक्यात कोसळली आणि राजकारणात नव्या चेहऱ्यांची एंट्री जोरात झाली.

---

चारही पक्ष स्वबळावर – कोण कुणाला थारा देणार नाही!

यंदा भोकरदन नगर पालिका निवडणूक कोणत्याही युतीशिवाय, कोणत्याही तडजोडीशिवाय थेट स्वबळावर लढवण्यासाठी चार मोठे पक्ष मैदानात उतरले आहेत—

• भाजप

• राष्ट्रवादी काँग्रेस – शरद पवार गट

• राष्ट्रवादी काँग्रेस – अजित पवार गट

• काँग्रेस

चारही पक्षांची स्वतंत्र रणनीती, स्वतंत्र उमेदवारी आणि स्वतंत्र संघटनशक्ती यामुळे ही निवडणूक आता त्रिकोणी नव्हे तर थेट चौरंगी आणि अति तीव्र बनली आहे.

---

नाराजीचा ज्वालामुखी : अपक्षांचा ‘तिखट’ तडका

उमेदवारी न मिळाल्याने असंतुष्ट झालेले अनेक कार्यकर्ते अपक्ष म्हणून थेट मैदानात उतरले आहेत.
राजकीय तज्ज्ञांच्या भाषेत सांगायचे झाल्यास
“अपक्ष हीच या निवडणुकीतील खरी ‘डार्क हॉर्स’ फौज आहे!”

1. ते कुणाचे मत कापतात? कुणाला खिंडीत पकडतात? शेवटी कुणाला साथ देतात? की विजयी षटकार लावतात. या सर्व प्रश्नांची उत्तरे संपूर्ण वातावरण अधिक धगधगत ठेवत आहेत.

---

काँग्रेसची सत्ता, पण विकासाचा हिशेब अपूर्ण?

मागील अनेक वर्षांपासून पालिकेची सत्ता काँग्रेस आणि राष्ट्रवादी आघाडीने उपभोगली असली, तरी शहरात विकासाचा अभाव प्रकर्षाने जाणवतो. हे आता शहरात उघडपणे बोलले जात आहे.
नागरिक स्पष्ट शब्दात प्रश्न विचारत आहेत
“इतकी वर्षे सत्ता होती, पण शहराचा चेहरा का बदलला नाही?” यामुळे काँग्रेसला मोठा प्रतिकूल फटका बसण्याची चिन्हे सर्वत्र दिसत आहेत.

---

मुख्य लढत भाजप विरुद्ध राष्ट्रवादी (शरद पवार) — दोन्ही बाजूंना प्रतिष्ठेचा प्रश्‍न

भाजपकडून माजी नगराध्यक्षा आशाताई माळी,
आणि राष्ट्रवादी (शरद पवार गट) कडून समरीन नाज वसीम मिर्झा—
ही दोन नावेच सध्या गल्लोगल्लीत चर्चेचा विषय बनली आहेत.अजित पवार गट व काँग्रेस मैदानात असले तरी त्यांच्या अंतर्गत गटबाजी, दरम्यान आलेल्या नाराज्या आणि अपक्षांचा दाब या गोष्टी त्यांची स्थिती अधिक गुंतागुंतीची करत आहेत.

---

राजकीय पक्षांच्या नेत्यांचा प्रतिष्ठेचा मुकाबला

• भाजप – आमदार संतोष दानवे यांच्यासाठी निवडणूक ‘प्रेस्टिज इश्यू’

• राष्ट्रवादी काँग्रेस (शरद पवार गट) – माजी आमदार चंद्रकात दानवे यांची प्रतिष्ठा पणाला

• काँग्रेस – जिल्हाध्यक्ष राजाभाऊ देशमुख यांचे अस्तित्व व सत्ताधाराचे भविष्य.

या तिघांची राजकीय प्रतिष्ठा आणि स्थानिक पकड यांची थेट परीक्षा आता मतदारांच्या न्यायालयात घेण्यात येणार आहे.

---

भोकरदनचा गड कुणाकडे जाणार?

चार पक्षांचे रणशिंग, अपक्षांची तिखट लढाई, राखीव जागेचे उलटलेले गणित, नागरिकांची नाराजी आणि दिग्गजांची प्रतिष्ठा या सगळ्यांच्या संगमामुळे भोकरदन नगर पालिका निवडणूक यंदा इतिहासातील सर्वाधिक चुरशीची आणि अनिश्चित झाल्याचे चित्र दिसत आहे. मतदारांचा कल, पक्षांचे संघर्ष, अंतिम क्षणांचे समीकरण आणि अपक्षांची भूमिका. या सर्व गोष्टी ठरवतील की भोकरदनचा गड कोण जिंकतो आणि कोण ‘इतिहास’ बनतो.