भोकरदन-जाफ्राबाद मतदारसंघाच्या शिरपेचात आणखी एक मानाचा तुरा!

भोकरदन-जाफ्राबाद मतदारसंघातील स्पर्धा परीक्षांमधील यशाची परंपरा अधिक बळकट होत असल्याचे चित्र पुन्हा एकदा समोर आले आहे. UPSC नागरी सेवा परीक्षेत अखिल भारतीय ८१२ वी रँक मिळवत इतिहास घडवणारे भिकन रोजेकर यांच्या यशानंतर आता मतदारसंघातील आणखी एका कन्येने उल्लेखनीय भरारी घेतली आहे.

लेहा ता. भोकरदन येथील शेतकरी श्री. ज्ञानेश्वर सोनुने यांची कन्या कु. आरती सोनुने हिने महाराष्ट्र लोकसेवा आयोगाच्या (MPSC) परीक्षेत घवघवीत यश संपादन करत ‘प्रथम वर्ग न्यायदंडाधिकारी’ पदावर निवड मिळवली आहे.

आरतीने इयत्ता सहावी ते बारावीपर्यंतचे शिक्षण विद्या विकास माध्यमिक व उच्च माध्यमिक विद्यालय, हिसोडा येथे पूर्ण केले. ग्रामीण भागातील शैक्षणिक वातावरणातून घडलेल्या या विद्यार्थिनीने जिद्द, सातत्य आणि अथक परिश्रमाच्या बळावर न्यायव्यवस्थेत स्थान मिळवत तालुक्याचे नाव उज्ज्वल केले आहे.

साध्या शेतकरी कुटुंबातून आलेल्या आरतीने मर्यादित साधनसामग्री आणि प्रतिकूल परिस्थितीवर मात करत मिळवलेले हे यश अनेक विद्यार्थ्यांसाठी प्रेरणादायी ठरत आहे. तिच्या निवडीमुळे केवळ सोनुने परिवाराचाच नव्हे, तर लेहा गाव, हिसोडा परिसर आणि संपूर्ण भोकरदन-जाफ्राबाद मतदारसंघाचा अभिमान उंचावला आहे.

अल्पावधीतच UPSC मध्ये भिकन रोजेकर आणि आता न्यायव्यवस्थेत आरती सोनुने यांच्या निवडीमुळे भोकरदन तालुका स्पर्धा परीक्षांमध्ये नवे यशप्रकरण लिहित असल्याची चर्चा परिसरात होत आहे.

आरतीच्या या उल्लेखनीय यशाबद्दल सर्व स्तरांतून अभिनंदनाचा वर्षाव होत असून परिसरात आनंदाचे वातावरण आहे.