महाराष्ट्र
भीषण अपघातात वडिलांसह दोन चिमुकले ठार ; पत्नी गंभीर जखमी
छत्रपती संभाजी नगर जळगांव महामार्गावरील घटना
- छत्रपती संभाजी नगर:
छत्रपती संभाजी नगर जळगांव महामार्गावर दुचाकीला एका भरधाव ट्रकने दिलेल्या जोराच्या धडकेत वडिलांसह दोन लहान चिमुकल्यांचा जागीच मृत्यू झाला असून, पत्नी गंभीररीत्या जखमी आहे. ही घटना आळंद गावाजवळ घडली.
मिळालेल्या माहितीनुसार गोपालसिंग चंदनशे, ऋदय गोपाल चंदनशे (वय ८ वर्ष), अवनी गोपाल चंदनशे (वय ९ वर्षे) यांचा अपघातामध्ये जागीच मृत्यू झाला. तर मीना गोपालसिंग चंदनशे या अपघातामध्ये गंभीर जखमी झाल्या. त्यांच्यावर रुग्णालयात उपचार सुरू आहे. महिलेच्या डोळ्यादेखत नवरा आणि दोन चिमुकल्यांचा जीव गेला यामुळे हळहळ व्यक्त केली जात आहे. छत्रपती संभाजीनगर ते जळगाव राष्ट्रीय महामार्गावरील आळंद परिसरातील गणपती मंदिराजवळ हा भीषण अपघात झाला. एका भरधाव ट्रकने दुचाकीला धडक देत सुमारे १०० फूटांपर्यंत फरपटत नेलं. या अपघातामध्ये ट्रकने दुचाकीवरून जाणाऱ्या एकाच कुटुंबातील चौघांना चिरडलं. या अपघातामध्ये एकाच कुटुंबातील तिघांना जागीच मृत्यू झाला. शुक्रवारी सायंकाळी चार वाजताच्या सुमारास हा अपघात झाला. या अपघातानंतर महामार्गावर मोठी वाहतूक कोंडी झाली होती. अपघाताचा अधिक तपास पोलिस करत आहेत.
