यवतमाळ पोलिस दलात हळहळ.! मारेगाव पोलीस ठाण्याचे ठाणेदार उमेश बेसरकर यांचे हृदयविकाराने निधन

यवतमाळ जिल्ह्यातील मारेगाव पोलीस स्टेशनचे ठाणेदार उमेश बेसरकर यांचे हृदयविकाराच्या झटक्याने निधन झाले. त्यांच्या अचानक झालेल्या निधनामुळे संपूर्ण पोलीस दलात तसेच मारेगाव परिसरात शोककळा पसरली आहे.

मिळालेल्या माहितीनुसार, उमेश बेसरकर यांची नुकतीच १४ जून २०२५ रोजी पुसदहून मारेगाव येथे बदली झाली होती. ते मूळचे नागपूर येथील असल्याची माहिती समोर आली आहे.

कर्तव्य बजावत असताना अचानक त्यांच्या छातीत वेदना सुरू झाल्या. तातडीने त्यांना यवतमाळ जिल्ह्यातील वणी येथील खासगी रुग्णालयात दाखल करण्यात आले. मात्र उपचार सुरू असतानाच त्यांची प्राणज्योत मालवली.

त्यांच्या निधनाच्या बातमीने मारेगाव बाजारपेठेत शोककळा पसरली असून, यवतमाळ पोलीस दलात हळहळ व्यक्त केली जात आहे.