छत्रपती संभाजीनगर:
छत्रपती संभाजीनगर जिल्ह्यातील गंगापूर तालुक्यात आज दसऱ्याच्या आनंददायी सणावर शोककळा पसरवणारी हृदयद्रावक घटना घडली. वाळूज परिसरातील लिंबे जळगाव येथे ट्रॅक्टर धुण्यासाठी गेलेल्या इमरान इसाक शेख (वय ३५) याच्यासह तीन लहान मुलांचा पाण्यात बुडून मृत्यू झाला.
मिळालेल्या माहितीनुसार, दसऱ्यानिमित्त इमरान शेतालगतच्या गायरान जमिनीत मुरूम उपसल्यामुळे तयार झालेल्या पाण्याच्या खोल खड्ड्यात ट्रॅक्टर धुण्यासाठी गेला होता. त्याच्यासोबत नातेवाईक इमू पठाण, जोहान पठाण आणि गौरव तारक ही तीन लहान मुले होती. ट्रॅक्टर धुण्यानंतर मुले पाण्यात आंघोळीसाठी उतरली. मात्र, अचानक ते बुडू लागले. हे पाहून इमरान त्यांना वाचवण्यासाठी धावला. पण पाणी खूप खोल असल्याने चौघांचेही प्राण वाचू शकले नाहीत.
या घटनेची माहिती मिळताच पोलिस आणि स्थानिक नागरिक घटनास्थळी दाखल झाले. पण तोपर्यंत चारही जणांचा मृत्यू झाला होता. दसऱ्यासारख्या शुभदिनी घडलेल्या या दुर्घटनेमुळे संपूर्ण परिसरात हळहळ व्यक्त होत आहे. आनंदोत्सवाच्या दिवशीच चार घरांवर दुःखाचा डोंगर कोसळल्याने गावात शोककळा पसरली आहे.
दरम्यान, गेल्या काही दिवसांपासून मराठवाड्यात झालेल्या मुसळधार पावसामुळे नद्या, नाले, ओढे व तलाव तुडुंब भरले आहेत. त्यामुळे अशा ठिकाणी पाण्यात जाण्याचे टाळावे, वाहत्या किंवा खोल पाण्याशी खेळू नये, असे आवाहन प्रशासनाकडून करण्यात येत आहे.
