मामा आणि मावसभाच्याचे थरकाप उडवणारे कृत्य! भोकरदन तालुक्यात किरकोळ वादातून हत्या; मृतदेह रस्त्यावर फेकून दिला

भोकरदन :
भोकरदन तालुक्यातील केदारखेडा–डावरगाव रोडवर रविवारी सकाळी सापडलेल्या युवकाच्या मृतदेहाने परिसरात खळबळ उडवली होती. अखेर पोलिसांनी केवळ दोन तासांत हत्येचा तपास उलगडत संशयित मामा आणि मावसभाच्याला अटक केली. किरकोळ वादातून घडलेली ही हत्या नात्यांनाच काळिमा फासणारी ठरली आहे.

मृत युवकाचे नाव परमेश्वर सुभाष लोखंडे (वय २६, मूळ रा. चिकलठाणा, सध्या पोस्ट ऑफिस परिसर, भोकरदन) असे असून, अटक करण्यात आलेल्या संशयित आरोपींमध्ये मामा अनिल विश्वनाथ कांबळे आणि मावसभाऊ अर्जुन रावसाहेब रामफळे या दोघांचा समावेश आहे.

 घटनेचा तपशील असा..

मिळालेल्या माहितीनुसार १८ ऑक्टोबरच्या रात्री साडेनऊच्या सुमारास हे तिघेही भोकरदन शहरातील डॉ. बाबासाहेब आंबेडकर चौक परिसरातील दारूच्या दुकानात एकत्र बसून मद्यपान करत होते. त्यावेळी परमेश्वर आणि अर्जुन रामफळे यांच्यात किरकोळ कारणावरून वाद झाला. नंतर मामा अनिल कांबळे यांनी दोघांना दुचाकीवरून घरी आणले, मात्र वाद तिथेच थांबला नाही. हाणामारीत परमेश्वर याला दंडुक्याने मारहाण करण्यात आली आणि तो जागीच ठार झाला.

पुरावे लपविण्याचा प्रयत्न…

गुन्हा लपविण्यासाठी मामा आणि मावसभाच्याने मृतदेह क्रूझर गाडीत टाकून रात्री दोनच्या सुमारास वालसा–डावरगाव पाटीजवळ रस्त्याच्या कडेला फेकून दिला. सकाळी आठच्या सुमारास गावकऱ्यांना मृतदेह दिसून आला आणि पोलिसांना माहिती मिळताच पोलीस निरीक्षक किरण बिडवे यांच्या मार्गदर्शनाखाली पथक घटनास्थळी दाखल झाले.

पोलिसांचा जलद तपास…

पंचनामा करून मृतदेह ग्रामीण रुग्णालयात हलविण्यात आला. केवळ दोन तासांत पोलिसांनी संशयित मामा व भाच्याला ताब्यात घेतले. या कारवाईत अप्पर पोलीस अधीक्षक आयुष नोपाणी, उपविभागीय अधिकारी डॉ. नितीन कटेकर, पोलीस निरीक्षक किरण बिडवे, उपनिरीक्षक पवन राजपूत, भास्कर जाधव, दत्ता राऊत व रामेश्वर सिनकर यांच्यासह पोलिस पथकाने सहभाग घेतला.

खून झालेल्या युवकाची पार्श्वभूमी….

पोलिसांचा जलद तपास….

मृत परमेश्वर हा मूळचा चिकलठाणा येथील रहिवासी असून, पत्नी डिलिव्हरीसाठी माहेरी गेल्याने तो काही दिवसांपासून मामा आणि बहिणीकडे राहत होता.
तो वारंवार मामा व मावसभाच्याला शिवीगाळ आणि धमक्या देत होता, या रागातूनच गुन्हा घडल्याचे प्राथमिक तपासात समोर आले आहे.पुढील तपास भोकरदन पोलिसांकडून सुरू असून, गुन्हा नोंदविण्याची प्रक्रिया सुरू आहे.