गजानन बँकेचे शिल्पकार हरपले ; सहकार क्षेत्रावर शोककळा

भोकरदन तालुकाच नव्हे तर संपूर्ण जालना जिल्ह्यात सहकार क्षेत्रातील अग्रगण्य व्यक्तिमत्त्व, श्री गजानन महाराज अर्बन को-ऑप. बँकेचे संस्थापक अध्यक्ष तथा भोकरदन कृषी उत्पन्न बाजार समितीचे माजी सचिव गणेशराव रोकडे पाटील यांचे वयाच्या ७७ व्या वर्षी सोमवार, दि. १५ डिसेंबर रोजी रात्री ११ वाजण्याच्या सुमारास निधन झाले. त्यांच्या निधनाने जिल्ह्यातील सहकार चळवळीवर शोककळा पसरली असून सहकार क्षेत्रात मोठी पोकळी निर्माण झाली आहे.

गणेशराव रोकडे पाटील यांनी दि. १६ मार्च १९९५ रोजी भोकरदन येथे श्री गजानन महाराज अर्बन को-ऑप. बँकेच्या पहिल्या व मुख्य शाखेची स्थापना केली. प्रामाणिकपणा, पारदर्शक व्यवहार आणि ग्राहकांचा विश्वास या त्रिसूत्रीवर त्यांनी बँकेची वाटचाल घडवून आणली. ग्राहकांनी दाखविलेल्या विश्वासाच्या जोरावर बँकेने अल्पावधीतच गरुडझेप घेतली.

भोकरदननंतर राजूर, जाफराबाद, वालसावंगी आणि माहोरा येथे शाखा स्थापन करत बँकेचा विस्तार करण्यात आला. आज या पाचही शाखांना ग्राहकांचा उत्तम प्रतिसाद मिळत असून गजानन महाराज बँकेने सहकार क्षेत्रात स्वतःची वेगळी ओळख निर्माण केली आहे. केवळ आर्थिक व्यवहारापुरते मर्यादित न राहता सामाजिक बांधिलकी जपत विविध उपक्रम राबविण्यातही संस्थेने पुढाकार घेतला. या बँकेच्या माध्यमातून अनेकांना रोजगाराच्या संधी उपलब्ध झाल्या.

गणेशराव रोकडे पाटील यांचे भाजपाचे ज्येष्ठ नेते तथा माजी केंद्रीय राज्यमंत्री रावसाहेब दानवे आणि आमदार संतोष दानवे यांच्याशी घनिष्ठ पारिवारिक संबंध होते. त्यांच्या पश्चात सतीशराव गणेशराव रोकडे (व्यवस्थापक – गजानन बँक), सुनील गणेशराव रोकडे, आशिष गणेशराव रोकडे अशी तीन मुले, पत्नी, दोन मुली, सुना व नातवंडे असा मोठा परिवार आहे. त्यांच्यावर भोकरदन येथील स्मशानभूमीत दिनांक १६ मंगळवार रोजी सकाळी ११ वाजता अंत्यसंस्कार करण्यात आले.

त्यांच्या निधनाने सहकार क्षेत्रातील एक अनुभवी, अभ्यासू व मार्गदर्शक नेतृत्व काळाच्या पडद्याआड गेले असून सर्व स्तरांतून हळहळ व्यक्त होत आहे.